ZAIDI YA WAFANYABIASHARA NA WAWEKEZAJI 100 WANUFAIKA NA KONGAMANO LA BIASHARA NA UWEKEZAJI KATI YA TANZANIA NA INDIA.

Balozi wa Tanzania nchini India, Mhe Anisa Mbega akifungua Kongamano la biashara na uwekezaji kati ya Tanzania na India Jijini Chennai, India.

Baadhi ya washiriki wa Kongamano la biashara na uwekezaji kati ya Tanzania na India wakifuatilia matukio mbalimbali wakati wa kongamano hilo.

..........................

Imeelezwa  kuwa zaidi ya wafanyabiashara na wawekezaji 110 kutoka Nchini Tanzania na India wamehudhuria kongamano la biashara na uwekezaji (Tanzania India Trade Conference katika jiji la Chennai India.

Kongamano hilo limesaidia kuwakutanisha wafanyabiashara na wawekezaji kutoka nchi hizo mbili kukutana na taasisi zinazohusika na maswala ya uwekezaji na biashara nchini kama vile Kituo cha uwekezaji nchini –TIC, Mamlaka ya maendeleo ya biashara –TANTRADE na mamlaka ya mapato nchini –TRA.

Akizungumza wakati wa ufunguzi wa kongamano hilo, Balozi wa Tanzania nchini India Mhe, Anisa Mbega ambapo amesema mataifa hayo mawili yanahistoria ya muda mrefu ikiwa ni pamoja na mahusino ya kidiplomasia.

“Tanzania na India ni marafiki na Nchi hizi zimekuwa na mahusiano mazuri ya kidiplomasia kwa muda mrefu ambayo yamejenga msingi imara katika biashara na uwekezaji kati ya nchi hizo”. Balozi Anisa amesema

Amesema Lengo la Kongamano hilo lilikuwa kutangaza fursa za biashara na uwekezaji zinazopatikana nchini Tanzania kwa wafanyabishara na wawekezaji waliopo nchini India.

Aidha, ameongeza kuwa India ni nchi muhimu kwa Tanzania kwani ni nchi ya tano kwa uwekezaji na biashara nchini Tanzania ambapo wawekezaji kutoka India wamewekeza mtaji wa kiasi cha dola za Marekani Bilioni 3.7.

Aidha, wafanyabiashara wa India walioshiriki Kongamano wameonesha nia ya kushiriki maonesho ya 46 ya biashara ya kimataifa ya Dar es Salaam ambayo yataanza tarehe 28 Juni hadi tarehe 13 Julai, 2022 ambapo watakutana na wafanyabiashara na kuona bidhaa zinazozalishwa nchini Tanzania.

Kongamano hilo limeandaliwa na Ubalozi wa Tanzania nchini India kwa kushirikiana na taasisi ya Uchumi na Biashara ya India (Indian Economic Trade Organization) huku likhudhuriwa na viongozi mbalimbali wa Serikali ya India kutoka Wizara ya Mambo ya Nje na Wizara inayosimamia masuala ya biashara na wajasiriamali na viongozi wa serikali kutoka Jimbo la Tamil Nadu lenye makao yake makuu Jijini Chennai.