SERIKALI KUDHIBITI MAJANGA YATOKANAYO NA USAFIRI WA BAHARI

Naibu Katibu Mkuu wizara ya ujenzi na uchukuzi anayesimamia sekta ya uchukuzi Dkt Ally Possi akizungumza wakati akifungua mafunzo ya siku tano Jijini Dar es salaam

Mkurugenzi Mkuu wa Shirika la uwakala wa Meli Nchini -TASAC Kaimu Mkeyenge akizungumza katika mkutano uliolenga kutoa uelewa katika shughuli za utafutaji na uokoaji Jijini Dar es salaam

....................

Na: Issa Mohamed –Dar es salaam.

Email: issahmohamedtz@gmail.com

Naibu Katibu Mkuu wizara ya ujenzi na uchukuzi anayesimamia sekta ya uchukuzi Dkt Ally Possi amesema kuna haja ya wataalamu wa sekta ya Bahari Nchini kupendekeza changamoto zinazoikumbuka sekta hiyo hasa katika swala zima la uokoaji pale ambapo majanga yanapotokea.

Dkt Possi ametoa kauli hiyo Jijini Dar es salaam wakati akifungua mafunzo ya siku tano yaliyowakutanisha shirika la uwakala wa meli Nchini –TASAC kwa kushirikiana na Shirika la Bahari Duniani –IMO lengo ni kutoa uelewa katika shughuli za utafutaji na uokoaji.

Amesema hatua stahiki za uokoaji zisipochukuliwa Taifa litapunguza kuaminiwa pamoja na kuhatarisha sekta nyingine ikiwemo usafirisha pamoja na sekta ya Utalii.

‘’Lazima tutambue Taifa letu linakabiliwa na changamoto gani kwahiyo wadau hawa watumie mkutano huu wa siku tano kuleta mapendekezo kwa serikali na sisi tutazichuku na kuzifanyia kazi’’ Amesema Dkt Possi

Kwa upande wake Mkurugenzi Mkuu wa Shirika la uwakala wa meli Nchini –TASAC Kaimu Mkeyenge amesema tayari serikali imeanza kutekeleza mkataba wa uanachama wa shirika la Bahari Duniani hasa katika kuwajengea uwezo wadau wa sekta ya Bahari.

‘’Kimsingi Nchi ya wanachama wa shirika hili la Bahari Duniani wanapaswa kutekeleza mkataba huu na sisi kama Tanzania tayari tumeshauridhia na hatuna budi kutekeleza mkatana ule’’ Amebainisha Mkeyenge.

Nao baadhi ya washiriki wa mkutano huo wamesema kuwa mafunzo hayo yawatasaidia katika kusimamia shughuli za utafutaji na uokoaji hatua ambayo itapunguza vifo vitonavyo na majanga hayo.

Mkataba wa kimataifa wa Utunzaji wa Mazingira ya Bahari Duniani umeanza kutekelezwa tangu mwaka 1985 ambapo Tanzania ni miongoni mwa Nchi ya  wanachama wa mkataba huo.