TIRA KUTANGAZA TAARIFA YA UTENDAJI WA SOKO LA BIMA KWA MWAKA 2023.

 ********

Mamlaka ya Usimamizi wa Bima Nchini (TIRA) inatarajia kutoa taarifa ya utendaji wa soko la bima nchini kwa mwaka 2023.

 Taarifa hiyo itatolewa Novemba 22, mwaka huu katika hafla itakayofanyika kwenye ukumbi wa Super Dome, Masaki, Jijini Dar es Salaam.

Kamishna wa TIRA, Dkt. Baghayo Saqware, amesema kuwa soko la bima nchini limeonyesha ukuaji mzuri, ambapo thamani ya soko imeongezeka kutoka shilingi trilioni 1.1 mwaka 2023 hadi trilioni 1.2 mwaka huu, na hivyo kuchangia kwa kiasi kikubwa katika ukuaji wa uchumi wa nchi.

Ukuaji huu unahusishwa na mazingira mazuri ya uwekezaji yaliyoanzishwa na serikali ya awamu ya sita chini ya Rais Dkt. Samia Suluhu Hassan.

Dkt. Saqware amesisitiza umuhimu wa bima katika jamii, akieleza kwamba bima hutoa kinga kwa mali, afya, na uwekezaji, na kwamba hutoa fidia wakati wa majanga ya kiuchumi na kijamii.

Aidha, ameelezea kwamba TIRA inatumia mifumo ya kidigitali katika kuendesha soko la bima.

Pia, Kamishna Saqware amewahimiza wananchi kuwa na utamaduni wa kutumia huduma ya bima ya nyumba, ambayo ni nafuu na itasaidia katika kukabiliana na majanga kama vile moto.

Amefafanua kuwa bima ya nyumba ni bei ndogo na inaweza kugharimu chini ya asilimia moja ya thamani ya nyumba.