Shirikisho la Vyama vya Mahujaji Tanzania (TAHAFE) limethibitisha kuwa maandalizi yote ya safari ya ibada ya Hijja kwa mwaka huu yamefikia hatua ya mwisho, kwa taasisi zote zinazoratibu mahujaji kutoka Tanzania Bara na Zanzibar, baada ya gharama muhimu za huduma kulipwa kikamilifu.
TAHAFE imesema maandalizi hayo yanajumuisha malipo ya mahema, hoteli na huduma nyingine muhimu zitakazotumiwa na mahujaji wakati wa utekelezaji wa ibada hiyo nchini Saudi Arabia, hivyo kuondoa changamoto za kiutendaji ambazo zimekuwa zikijitokeza katika miaka ya nyuma.
Akizungumza kuhusu hatua inayofuata, kiongozi wa shirikisho hilo alisema juhudi kubwa sasa zinaelekezwa katika kuwahamasisha mahujaji walioko kwenye orodha ya kusafiri kuhakikisha wanatimiza masharti yote yanayohitajika kabla ya kuanza safari, ikiwemo kupata hati za kusafiria kwa wakati na kuzingatia taratibu za usalama.
“Hakuna changamoto katika maandalizi kwa upande wa taasisi. Kazi iliyobaki ni kwa mahujaji wenyewe kuhakikisha wanakamilisha taratibu zote mapema ili safari ifanyike kwa utulivu na kwa mpangilio mzuri,” alisema.
Licha ya maandalizi hayo kukamilika, TAHAFE imeeleza kusikitishwa na mwitikio mdogo wa mahujaji katika hatua ya usajili. Takwimu zinaonyesha kuwa hadi sasa ni mahujaji wapatao 1,300 pekee waliojiandikisha, wakati Tanzania imepangiwa nafasi ya mahujaji 20,000 kwa msimu huu wa Hijja.
Katika hatua nyingine, shirikisho hilo limefafanua kuwa msimu huu umeambatana na mabadiliko kadhaa ya kiutaratibu, yakiwemo masharti mapya ya kiafya. Mahujaji wote sasa wanapaswa kupima afya zao kabla ya kusafiri, ili kuhakikisha wanakuwa katika hali nzuri ya kiafya na kuweza kutekeleza ibada bila hatari.
TAHAFE imewataka Watanzania wenye nia ya kutekeleza ibada ya Hijja mwaka huu kutumia fursa iliyopo na kujitokeza mapema, ili kujaza nafasi zilizotolewa na kuepuka usumbufu wa dakika za mwisho.
Post a Comment