Na Mwandishi Wetu – Dar es Salaam
SERIKALI imekitaka Chama cha Wataalamu na Wadau wa Nishati nchini (TEA) kufanya kazi kwa kuzingatia miongozo, sera na taratibu zinazoandaliwa na serikali katika sekta ya nishati.
Akizungumza Februari 2026 jijini Dar es Salaam kwa niaba ya Waziri wa Nishati, Deogratius Ndejembi, mwakilishi wa wizara hiyo, Emilian Nyanda, alisema TEA ina mchango mkubwa katika kuendeleza sekta ya nishati kwa kuwaunganisha wadau mbalimbali na kusikiliza pamoja na kutatua changamoto zinazowakabili.
Nyanda alisema wizara inahitaji wadau watakaoshirikiana nayo kusukuma gurudumu la maendeleo ya sekta ya nishati, ambayo ni muhimu kwa ustawi wa nchi.
“Sote tunajua umuhimu wa sekta ya nishati. Tunapopata mdau kama chama hiki, ni muhimu kushirikiana na serikali katika kuendeleza ajenda ya upatikanaji wa nishati,” alisema Nyanda.
Alifafanua kuwa nishati inayozungumziwa si umeme pekee, bali pia inahusisha nishati safi ya kupikia, matumizi bora ya nishati pamoja na sekta ya usafiri.
Kwa mujibu wa Nyanda, wizara inaiangalia TEA kama mdau muhimu katika utekelezaji wa ajenda za nishati, hivyo imeongeza wigo wa wadau ili kujenga uelewa mpana kuhusu masuala ya nishati.
“Tunategemea TEA itusaidie kuwafikia wadau wengi zaidi, kushughulikia masuala ya utafiti na ubunifu, pamoja na kuwa jukwaa la kubadilishana mawazo kati ya serikali na wadau. Pia watakuwa jicho pana katika kufuatilia utekelezaji wa mipango ya wizara na kusaidia kurekebisha changamoto zitakazojitokeza,” alisisitiza.
Kwa upande wake, Mwenyekiti wa TEA, George Michael, alisema lengo la kuanzishwa kwa chama hicho ni kuwaunganisha wadau wa nishati ili wawe sauti moja katika kuwasilisha hoja, changamoto na mapendekezo yao kwa ufanisi kabla ya kuwasilishwa katika wizara husika kwa ajili ya utekelezaji wa sera na sheria.
“Tunawakaribisha wadau wote na vyama mbalimbali vya nishati kuungana nasi ili tushirikiane kwa karibu kusukuma gurudumu la maendeleo na kufikia matumizi makubwa na bora ya nishati, hususan nishati safi inayohitajika kwa sasa katika jamii,” alisema Michael.
Aidha, alieleza kuwa TEA itakuwa msaada kwa wadau katika masuala ya kisheria, akibainisha kuwa wengi hukumbana na changamoto lakini hukosa mwongozo wa namna ya kupata msaada stahiki.
Aliongeza kuwa kupitia ushirikiano wa kimataifa, TEA itaunganisha wanachama wake na fursa mbalimbali duniani, jambo litakalowezesha kubadilishana uzoefu na teknolojia.
Kupitia chama hicho, wadau wanaojihusisha na uzalishaji na matumizi ya nishati kama gesi ya magari, petroli, oksijeni, biogesi na umeme wa maji (hydro), pamoja na taasisi kama Tanzania Atomic Energy Commission, watanufaika na mtandao mpana wa ushirikiano na maendeleo.
Post a Comment