****
Serikali imeonya vikali wafanyabiashara wanaoficha mafuta kwa lengo la kuyauza kwa bei ya juu, ikisisitiza kuwa hakuna upungufu wa nishati hiyo nchini licha ya hali ya sintofahamu inayochangiwa na vita ya Mashariki ya Kati.
Onyo hilo limetolewa na Katibu Mkuu wa Wizara ya Nishati anayeshughulikia Mafuta na Gesi, James Mataragio, wakati wa ziara ya ukaguzi wa maghala na vituo vya mafuta jijini Dar es Salaam Machi 25, 2026.
Amesema Serikali imebaini kuwepo kwa taarifa za ucheleweshaji wa upakiaji mafuta na lawama kuelekezwa kwa Mamlaka ya Mapato Tanzania, hali inayozua hofu isiyo ya lazima miongoni mwa wananchi.
“Hatutavumilia mfanyabiashara yeyote atakayeficha mafuta ili kujinufaisha na hali ya soko. Tutachukua hatua kali dhidi yao kama wahujumu uchumi,” amesema Dk Mataragio.
Ameeleza kuwa lengo la ziara hiyo ni kujiridhisha kuhusu akiba iliyopo na kuhakikisha usambazaji wa mafuta unafanyika bila vikwazo, huku akisisitiza kuwa hakuna sababu ya wananchi kupaniki na kununua mafuta kwa wingi.
Kwa mujibu wa Serikali, akiba ya mafuta iliyopo inatosha hadi Julai 2026, huku mikakati zaidi ikiendelea kuwekwa kukabiliana na athari za vita ya Mashariki ya Kati inayoathiri soko la dunia.
Naye Mkurugenzi Mkuu wa EWURA, James Andilile, amesema Tanzania imechukua hatua za mapema kuhakikisha hakuna upungufu wa mafuta licha ya changamoto za kimataifa.
Ameongeza kuwa utegemezi wa mafuta kutoka Mashariki ya Kati umeathiri gharama za uagizaji kutokana na kupanda kwa bei na usafirishaji, lakini hali hiyo bado inadhibitiwa ndani ya mipango ya Serikali.
Katika ziara hiyo, pia ilibainika kuwa kampuni ya Camel Oil inaendelea kutoa huduma usiku na mchana, huku Serikali ikiwataka wadau wote wa sekta hiyo kufuata maelekezo na kuepuka vitendo vinavyoweza kusababisha uhaba bandia wa mafuta nchini.
Post a Comment