.......
Na: Moses Mwakibolwa
Balozi wa Mazingira – Manispaa ya Kinondoni
Miti ni miongoni mwa rasilimali muhimu zaidi kwa maisha ya binadamu na viumbe wengine duniani. Mbali na kutoa kivuli na kupendezesha mazingira, miti ina mchango mkubwa katika kuzalisha hewa ya oksijeni tunayovuta na kupunguza kiwango cha hewa ukaa (kaboni dioksidi), ambao huchangia mabadiliko ya tabianchi na ongezeko la joto duniani.
Kadiri miji inavyoendelea kukua kupitia ujenzi wa makazi, barabara na viwanda, ndivyo uchafuzi wa hewa unavyoongezeka. Hali hiyo inaweza kusababisha kuongezeka kwa magonjwa ya mfumo wa upumuaji, ikiwemo pumu, mzio na magonjwa mengine yanayohusiana na ubora duni wa hewa. Kupanda na kutunza miti ni moja ya njia rahisi, endelevu na zenye gharama nafuu za kuboresha ubora wa hewa tunayopumua.
Mbali na kusafisha hewa, miti husaidia kupunguza joto kwa kutoa kivuli, kupunguza athari za mionzi ya jua na kuboresha hali ya hewa katika maeneo ya makazi. Pia huzuia mmomonyoko wa ardhi, huhifadhi unyevunyevu wa udongo, hulinda vyanzo vya maji na kuwa makazi ya viumbe mbalimbali wanaochangia uwiano wa mazingira.
Hata hivyo, kupanda mti pekee hakutoshi. Mti unahitaji kutunzwa kwa kumwagiliwa maji, hasa katika hatua za awali za ukuaji, kuondolewa magugu yanayouzunguka, kulindwa dhidi ya mifugo na vitendo vya uharibifu, pamoja na kutibiwa pale unaposhambuliwa na wadudu au magonjwa kwa kuzingatia ushauri wa wataalamu wa kilimo na misitu. Matumizi sahihi ya viuatilifu na dawa za mimea, inapobidi, yanaweza kusaidia kuongeza kiwango cha ukuaji na uhai wa miche.
Akizungumzia juhudi za uhifadhi wa mazingira, Balozi wa Mazingira wa Manispaa ya Kinondoni, Moses Mwakibolwa, amesema kuwa eneo la Mbweni limeendelea kuwa mfano wa mafanikio katika kampeni za upandaji miti. Amesema katika kipindi cha miaka mitatu iliyopita zaidi ya miche 8,700 imepandwa katika maeneo mbalimbali ya Mbweni Malindi Estate.
Mwakibolwa ameeleza kuwa pamoja na juhudi za kupanda miti, kuna umuhimu wa kuhakikisha miche yote iliyotolewa na Serikali pamoja na ile iliyotolewa au kununuliwa kupitia wadau wa maendeleo inapata huduma stahiki za kitaalamu, ikiwemo matumizi ya viuatilifu na dawa za mimea pale inapohitajika. Amesisitiza kuwa kupalilia pekee hakutoshi kuhakikisha mti unakua vizuri na kufikia malengo yaliyokusudiwa.
Aidha, ametoa shukrani kwa wanafunzi na walimu wa Montessori New Era Secondary School, wananchi wa Mbweni Malindi Estate, viongozi wa Serikali ya Mtaa, Kata ya Mbweni, Manispaa ya Kinondoni pamoja na wadau wote wa maendeleo kwa ushirikiano wao mkubwa katika kila hatua ya kampeni za upandaji na utunzaji wa miti.
Kwa wakazi wa Mbweni Malindi Estate, miti iliyopandwa na wananchi pamoja na wanafunzi ni alama ya uzalendo wa mazingira na urithi wa vizazi vijavyo. Ni wajibu wa kila mmoja kuhakikisha miti hiyo inalindwa na kukua ili kuendelea kutoa manufaa kwa jamii.
Hewa safi si bahati; ni matokeo ya maamuzi tunayofanya leo. Tukipanda miti na kuitunza ipasavyo, tutaimarisha afya zetu, tutalinda mazingira yetu, tutahifadhi vyanzo vya maji na kujenga taifa lenye maendeleo endelevu kwa manufaa ya kizazi cha sasa na kijacho.
"Panda mti leo, linda maisha ya kesho."
Post a Comment