MIGOGORO YA ARDHI: Mwanasheria Afafanua Hatua Muhimu Kabla ya Kununua Kiwanja

...

AFISA Ardhi kutoka Wizara ya Ardhi aonya wananchi kufuata taratibu za kisheria ili kuepuka utapeli na migogoro ya umiliki wa ardhi

Na Mwandishi Wetu

Migogoro ya ardhi imeendelea kuwa changamoto kubwa nchini, huku wananchi wengi wakijikuta wakipoteza fedha na mali kutokana na kununua viwanja bila kufuata taratibu za kisheria. Kutokana na hali hiyo, wananchi wametakiwa kuwa waangalifu na kuhakikisha wanapata ushauri wa wataalamu kabla ya kufanya maamuzi ya kununua ardhi.

Akizungumza katika kipindi cha Morning Express kinachorushwa na UFM Radio, Mwanasheria na Afisa Ardhi kutoka Wizara ya Ardhi, Kelvin Kipeta, amesema hatua ya kwanza kwa mnunuzi ni kuhakikisha anafahamu historia na uhalali wa kiwanja anachokusudia kununua.

«"Usikimbilie kulipa fedha kwa sababu umevutiwa na bei au eneo la kiwanja. Kwanza hakikisha umepata taarifa sahihi kuhusu umiliki wake na kama hakina mgogoro," amesema Kipeta.»

Ameeleza kuwa ikiwa kiwanja hakijasajiliwa na hakina hati ya umiliki, mnunuzi anatakiwa kufika katika halmashauri husika na kuonana na maafisa wa mipango miji au maafisa ardhi ili kuthibitisha hali halisi ya eneo hilo.

Kwa mujibu wake, wataalamu hao wana uwezo wa kubaini kama eneo hilo limepangwa kwa matumizi ya makazi, biashara, taasisi au matumizi mengine ya umma, jambo ambalo litamsaidia mnunuzi kufanya uamuzi sahihi na kuepuka kuingia katika migogoro ya baadaye.

Aidha, Kipeta amesisitiza umuhimu wa kufanya upekuzi wa nyaraka za umiliki na kuhakikisha kuwa muuzaji ndiye mmiliki halali wa kiwanja kabla ya kusaini mkataba au kufanya malipo yoyote.

Amesema mikataba ya mauziano inapaswa kuandaliwa kwa mujibu wa sheria na kushuhudiwa na mamlaka husika ili kulinda maslahi ya pande zote zinazohusika.

Wataalamu wa ardhi wanaeleza kuwa kufuata taratibu hizi kutapunguza kwa kiwango kikubwa migogoro ya ardhi ambayo imekuwa ikisababisha hasara kwa wananchi, migogoro ya muda mrefu mahakamani na kuchelewesha maendeleo ya kijamii na kiuchumi.

Serikali kupitia Wizara inayosimamia masuala ya ardhi imeendelea kuwahimiza wananchi kutumia huduma za wataalamu wa ardhi pamoja na wanasheria katika kila hatua ya ununuzi wa ardhi ili kuhakikisha haki zao zinalindwa na migogoro ya umiliki inapungua.

Mahojiano hayo yaliyofanyika kupitia kipindi cha Morning Express cha UFM Radio yalitoa elimu kwa umma kuhusu umuhimu wa kufuata sheria na taratibu za ununuzi wa ardhi, ikiwa ni sehemu ya juhudi za kuongeza uelewa wa wananchi na kupunguza migogoro inayoweza kuzuiliwa