DCEA YAKAMATA TANI 18 ZA DAWA ZA KULEVYA

Kamishna Mkuu wa DCEA, Kamishna Aretas Lyimo, Akizungumza na waandishi wa habari mapema leo jijini Da es salaam.

********

 Mamlaka ya Kudhibiti na Kupambana na Dawa za Kulevya (DCEA) imefanikiwa kukamata zaidi ya kilogramu 18,000 za dawa za kulevya katika operesheni zake za miezi mitatu.

Operesheni hizo zilifanyika katika mikoa 14 nchini kati ya Julai na Septemba 2026.

Kamishna Mkuu wa DCEA, Kamishna Aretas Lyimo, amesema hayo leo jijini Dar es Salaam wakati akielezea matokeo ya operesheni hizo.

Amesema jumla ya kilogramu 18,078.41 za dawa za kulevya zilikamatwa katika operesheni hizo.

Kati ya kiasi hicho, kilogramu 11,504.76 zilikuwa bangi, huku mirungi ikiwa kilogramu 6,529.5.

Aidha, DCEA ilikamata kilogramu 44.45 za bangi aina ya skanka pamoja na gramu 41.25 za heroin.

Katika hatua nyingine, watuhumiwa 289 walikamatwa kutokana na operesheni hizo.

Kwa mujibu wa Lyimo, kati yao, watuhumiwa 169 tayari wamefikishwa mahakamani.

Alisema taratibu za kisheria zinaendelea dhidi ya watuhumiwa wengine waliokamatwa.

DCEA pia ilifanikiwa kukamata vyombo mbalimbali vya usafirishaji vilivyodaiwa kutumika katika shughuli za dawa za kulevya.

Vyombo hivyo ni magari manane, bajaji moja na pikipiki 40.

Mikoa iliyofikiwa na operesheni hizo ni Dar es Salaam, Tanga, Kilimanjaro, Arusha, Morogoro, Tabora, Shinyanga, Mwanza, Mara, Dodoma, Mbeya, Lindi, Mtwara na Ruvuma.

Lyimo amesema bangi bado inaongoza kwa kiwango cha uzalishaji na ukamataji katika baadhi ya maeneo nchini.

Mikoa ya Morogoro na Tabora imetajwa kuwa miongoni mwa maeneo yaliyofanya ukamataji mkubwa wa bangi.

Morogoro pekee, DCEA ilikamata kilogramu 6,299.24 za bangi pamoja na kilogramu 226 za mbegu za bangi.

Nchini Tabora, kilogramu 4,650.86 za bangi zilikamatwa pamoja na kilogramu 203 za mbegu za bangi.