TAKA SI UCHAFU PEKEE, NI DHAMANA YA AJIRA, BIASHARA NA UCHUMI WA KIJANI

.......

MAKALA MAALUMU

Na Mwandishi Wetu, DAR ES SALAAM

Wakati changamoto ya ongezeko la taka ikiendelea kuwa tatizo kubwa katika maeneo mengi nchini Tanzania, Balozi wa Mazingira wa kujitolea, Moses Mwakibolwa, ameibuka na wito mpya kwa Watanzania kubadili mtazamo wao na kuacha kuzichukulia taka kama uchafu usio na thamani.

Kwa mujibu wa Mwakibolwa, taka zinaweza kuwa chanzo kikubwa cha ajira, kipato, biashara, uwekezaji na uzalishaji wa bidhaa mbalimbali, endapo jamii itapewa elimu sahihi kuhusu namna ya kuzitenganisha, kuzikusanya, kuzichakata na kuzirejelezwa.

Akizungumza katika mahojiano maalumu na Radio Kiss FM, Mwakibolwa amesema Tanzania ina fursa kubwa ya kujenga uchumi wa kijani kupitia usimamizi bora wa taka.

«“Watanzania tunapaswa kubadili mtazamo wetu. Taka si kitu cha kutupa na kukisahau. Ndani ya taka kuna fursa za biashara, ajira na uwekezaji. Kile ambacho leo kinaonekana kuwa uchafu, kinaweza kesho kuwa bidhaa yenye thamani kubwa,” amesema Mwakibolwa.»

TAKA ZINAWEZA KUZAA MAKAMPUNI MAKUBWA

Balozi Mwakibolwa amesema sekta ya taka inaweza kuwa chanzo cha kuanzishwa kwa makampuni na biashara mbalimbali zinazojihusisha na ukusanyaji, uchambuzi, uchakataji na urejelezaji wa taka.

Kwa mtazamo wake, taka za plastiki, karatasi, mabaki ya chakula, metali na aina nyingine za taka zinaweza kugeuzwa kuwa malighafi au bidhaa mpya zenye thamani sokoni.

Amesema vijana, wanawake, wafanyabiashara na wawekezaji wanapaswa kuanza kuona taka kama sehemu ya uchumi mpya unaoweza kuzalisha fursa nyingi za ajira.

«“Tunaweza kuanzisha biashara na viwanda vinavyotokana na taka. Tunaweza kuzalisha bidhaa mbalimbali na pia kuendeleza teknolojia za kubadili baadhi ya taka kuwa nishati mbadala,” amesema.»

WITO WA KUANZISHA MADARASA YA TAKA ZERO MITAANI

Katika kuhakikisha dhana hiyo inawafikia wananchi moja kwa moja, Mwakibolwa amesisitiza umuhimu wa kuanzishwa kwa Madarasa ya Taka Zero katika mitaa na maeneo ya makazi.

Amesema madarasa hayo yatakuwa jukwaa muhimu la kutoa elimu kwa wananchi kuhusu namna ya kupunguza uzalishaji wa taka, kuzitenganisha kulingana na aina, kuzitumia tena na kuzirejelezwa.

Kwa mujibu wake, elimu hiyo haipaswi kubaki katika kumbi za mikutano pekee, bali inapaswa kuwafikia wananchi katika maeneo wanayoishi na kufanya shughuli zao za kila siku.

«“Tunataka elimu ya Taka Zero ishuke mpaka mtaani. Mwananchi afahamu taka gani inaweza kurejelewa, taka gani inaweza kutumika tena na taka gani inaweza kuwa chanzo cha nishati au bidhaa nyingine,” amesisitiza.»

BODABODA, MAMA LISHE NA BABA LISHE WAALIKWA

Mwakibolwa pia ametoa wito kwa wadau mbalimbali wa jamii, wakiwemo madereva wa Bodaboda, Mama Lishe, Baba Lishe, wanafunzi, wafanyabiashara na wananchi kwa ujumla, kujitokeza kushiriki katika shughuli za elimu ya mazingira.

Amesema makundi hayo yana nafasi kubwa katika kufanikisha mapinduzi ya usimamizi wa taka kutokana na mwingiliano wao wa kila siku na jamii.

Kwa mantiki hiyo, amewakaribisha wadau hao kushiriki katika Tamasha la Mazingira litakalofanyika katika Manispaa ya Kinondoni, ambapo pamoja na michezo na burudani, kutakuwa na elimu kuhusu mazingira, usimamizi wa taka na fursa zinazopatikana katika uchumi wa kijani.

“KILA MMOJA ATAONDOKA NA KITU”

Kwa msisitizo mkubwa, Mwakibolwa amesema lengo la Tamasha hilo si burudani pekee, bali ni kuhakikisha kila mshiriki anapata maarifa, uelewa na fursa ya kujifunza jambo litakalomsaidia katika maisha yake na shughuli zake za kiuchumi.

«“Tunawakaribisha Bodaboda, Mama Lishe, Baba Lishe, wanafunzi na wananchi wote. Tunataka kila mmoja anayekuja katika Tamasha apate kitu cha kujifunza. Mazingira ni maisha, lakini pia mazingira yana fursa za uchumi,” amesema.»

KUELEKEA UCHUMI WA TAKA ZERO

Dhana ya Taka Zero – Zero Waste inalenga kujenga jamii inayopunguza kiasi cha taka kinachotupwa ovyo kwa kuhamasisha matumizi sahihi ya rasilimali, urejelezaji na ubunifu wa kuzalisha bidhaa mpya.

Mwakibolwa anaamini kuwa Tanzania inaweza kupiga hatua kubwa katika kulinda mazingira na wakati huohuo kutengeneza maelfu ya fursa za ajira endapo wananchi, Serikali, sekta binafsi na wadau wa maendeleo watashirikiana.

Wito wake sasa ni mmoja: Watanzania waache kuona taka kama mwisho wa matumizi ya bidhaa, waanze kuziona kama mwanzo wa fursa mpya.

Kwa mtazamo huo, taka zinaweza kubadilika kutoka kuwa tatizo la mazingira na kuwa nguzo ya ajira, biashara, makampuni mapya, uzalishaji na uchumi wa kijani.

Kaulimbiu ni wazi: TAKA SI UCHAFU PEKEE — TAKA NI FURSA.

MWISHO