Shirika la Mawasiliano Tanzania (TTCL) limeelekeza nguvu katika kuboresha huduma kwa wateja, likiwataka wafanyakazi wake kuhakikisha kila mteja anapata msaada unaostahili na kwa wakati.
Akizungumza wakati wa kufunga Wiki ya Huduma kwa Wateja 2026, Meneja wa Huduma kwa Wateja wa TTCL, Diwan Mwamengo, amesema kauli mbiu ya _“The Extra Mile”_ inalenga kujenga utamaduni wa kuwahudumia wateja kwa kujituma zaidi.
Amesema ni muhimu kwa wafanyakazi kusikiliza maoni ya wateja, kushughulikia malalamiko yao na kutumia teknolojia kurahisisha upatikanaji wa huduma, akieleza kuwa jukumu hilo linawahusu wafanyakazi wote wa shirika.
Mwamengo amezitaja huduma za Fiber Mlangoni Kwako, simu, intaneti na Public Wi-Fi kuwa sehemu ya huduma zinazoendelea kutolewa na TTCL, huku akisisitiza umuhimu wa kuimarisha ubora wake ili kuendana na mahitaji ya watumiaji.
Kwa upande wake, Rais wa Serikali ya Wanafunzi wa Chuo cha Elimu ya Biashara (CBE), Mnandwa Mnandwa, amesema Public Wi-Fi imekuwa na mchango kwa wanafunzi kwa kuwawezesha kupata intaneti. Ameipongeza TTCL kwa ushirikiano na kuomba huduma hiyo iendelee kuboreshwa.
Wateja Huruma wa Mombasa, Ukonga, na Rajabu wa Kariakoo wameeleza kufurahishwa na huduma mbalimbali za shirika hilo. Maoni yao yanaonesha umuhimu wa kuendelea kuboresha huduma ili kukidhi matarajio ya wateja.
Post a Comment